Page 1 - САЙЫЛЫГЫМ БАРАХСАН

САЙЫЛЫГЫМ БАРАХСАН

Төрөөбүт-үөскээбит үрэҕим барахсан,
Ахтаммын эйиэххэ бу кэлэн турабын,
Айыы от симэхтээх кырдалын үрдүгэр
Астынан истиҥник одуулуу көрөбүн.

Саймархай салгыннаах күөх урсун халлааҥҥар
Күөрэгэй чыычааҕын ыллыыра кэрэтиэн,
Аллараа хонуугар сиэдэрэй сибэккин,
Сирилии сипсиһэ сиэттиһэ үүммүттэр.

Этиҥнээх ардахтан, күн уотун күүһүттэн
Өҥ буордаах кырыскар күөх көбүөр тэлгэммит,
Уу чуумпу киэҥ дуолуҥ салгына ырааһын
Сүөгэйдии сөрүүнүөҥ, үрдүгэ кэрэтиэн.

Хурустаал таас курдук ып-ыраас уулардаах
Силбиһэ үөскээбит мэндээркэй күөллэриҥ,
Наҥнаспыт хатыҥа, лөглөспүт үөттэрэ
Сүрэхпин нүөлүттэ, санаабын дьэгдьиттэ.

Араҕас усмнастаах лиҥкинэс тиит мастар
Үрдүккэ тардыспыт күөх нуоҕай мутукчаҥ,
Лочугур туорахтаах хоп-хойуу лабаалыын

Унаар күөх урсуҥҥар куустуһан тураллар.

Дьэдьэннээх халдьаайы, отонноох куула тыа
Тайахтаах, куобахтаах хараҥа ойуур сир
Күөх үөрэ мустубут, балыктаах күөллэриҥ
Бараммат-хороммот айылҕан бэлэҕэ.

Сайылык түптэтин унаарар буруота
Алаадьы, лэппиэскэ амтаннаах сыттара,
Ыраахтан кэлбити ыҥыра турара
Бар дьонун сылаатын абылаан кыйдыыра.

Атах сыгынньах моҕотой үүрэрбит
Лыахтыы бараары мутукча баһарбыт,
Уу баһа таарыйа сөтүөлүү сырсарбыт
Ардыгар тустаммыт эрийсэр буоларбыт.

“Буруолаах” анныттан буруо бурҕатан,
“Маҥан сыыр” аннынан ыанньыгы үүрэрбит,
Титииккэ Оппуруос, Өлөксөөс, Дуомуна буоланнар
Титииккэ тахсаннар ынах ыыр этилэр.