Page 2 - САЙЫЛЫГЫМ БАРАХСАН

Туманнаах киэһэҕэ “Дабааны” үрдүнэн
“Толоонтон” хонуктуу отчуттар тахсаллар,
Бэйэбит дьоммутун бэриэттээн көрсөөрү
“Аччыгый тиэрбэскэ” тоһуйар этибит.

Эһэкээм барахсан сонообут сонуогун
Уу сүүрэн сиҥнэрбит, титирик бүөлээбит
Баайыылаах сиэмэни тиэйбит ол суоллара
Оҥойбут омоонун кэриэстии көрөбүт.

Урут бу солооһун өлгөмүк үүнэрин
Үс мастаах бүтэйи үрдүнэн көстөрүн,
“Көһөр сис” суолунан айаннаан иһэннэр
- Өлөксөй эрэйин төлөппүт –дииллэрэ.

Өтөҕүм эрэйдээх, үөскээбит бу мин дьиэм,
Утуйбут ампаарбыт, оонньообут хоспохпут,
Үүнүүлээх сиэмэни ыйаабыт аргы мас
Үс үүттээх баҕана сиэрдийэ олбуобут.

Адаархай мутуктаах аарыма тиит маспыт
Билигин даҕаны бэрт чэгиэн тураахтыыр,
Городки оонньуурбут бу баалкы мастарбыт
“Лааппы” сыыр үрүгэр ыһыллан сытаахтыыр.

Мэхээлэ ампаара, Ньукулай буор дьиэтэ
Үүт уурар умуһах, ынах ыыр титииктэр
Эргэрбит көрүҥнээх буоллаллар даҕаны
Булчуттар бостуук дьон туһанар эбиттэр.

Барытын бу манна эргитэ санаатым
Оҕочоос сылдьаммыт оонньообут сааспытын
Үөскээбит өтөхпүн, үрэхпин көрөммүн
Санаам дьэ дуоһуйда, сүрэҕим уоскуйда.

Приморской кыраай, Уссирийскай куорат,
Уссири гостиница, Ахсынньы ый 5-8 күннэрэ
1968 сыл.

Н.А. Орлов