Page 87 - Кун кууьар хайатыттан

Түмүк төрдүлээх-төбөлөөх,
Сир-халлаан үтүөлээх-мөкүлээх,
Кэскил олох төлкөлөөх,
Албан ааттаах да кылгас үйэлээх.

Ауэзовы, Айтматовы харыстыахха,
Айылҕа сокуонун уларытыахха,
Өлбөт тыыннаах санаалыахха,
Чулуу дьону ытыктыахха.

Майгыннаһар талааннаах дьылҕалар
Үлүскэн үлэнэн тыыннаах хаалаллар,
Кырдьыгы эрэ өрө тутаннар
Норуот махталын ылаллар.

Олохпут араас да кистэлэҥнээх,
Бэйэтэ кылгас да күннээх,
Киһи кэмнээх-кэрдиилээх,
Өлүү туһунан билбэт кэриҥнээх.

Эдэр саас суолтатын сүтэрбэт
Эрээри, өлүүттэн сэрэппэт.
Арай күн түүҥҥэ ситтэрэр,
Күннэтэ сырдыы эргийэр.

Дьылҕа бэлэҕин эн билиэҥ,
Өрө көтүөҥ эбэтэр аллара түһүөҥ,
Сибэкки кэрэтэ да кэхтиэ,
Тиһэх күн эмиэ тиийэн кэлиэ.

Дьылҕа Хаан ыйааҕын толоруох тустаахпыт,
Ол сокуону кэспэт аналлаахпыт,
Таҥараҕа махтана ааттыахтаахпыт,
Олохпут кылгас кэмин саныахтаахпыт.

Туох барыта сүтэр, күдэн буолан көтөр.
Арай киһи үлэтинэн үйэтийэр,
Суолталааҕа чорбойор,
Кэм-кэрдии бэскитигэр ууруллар.

85