Page 1 - П.А. Ойуунскай тереебутэ 100 сылын туолуутугар. Ахтыылар

П.А. Ойунскай төрөөбүтэ 100 сылын туолуутугар.

Ахтыылар.

А. Жирков, педагогическай үлэ ветерана, Курганскай уобалас олохтооҕо.

1988 сыл атырдьах ыйын 23 күнүнээҕи «Ленинскэй тэрийээччи» Хаһыакка,
«Бириэмэтигэр улахан оскуола этэ» диэн ыстатыйатыттан быһа тардыы.

... 1936 сыллаахха икки мэндиэмэннээх оскуола оҥоһуута толору бүппүтэ, үөрэнэр
инвентарь сиһилии булуллубута. Итинэн, Мүрү эбэ хотун маанылаах хомуутугар
оҥуруокка дьикти, кэрэ оскуола дьэҥдэйэн тахсыбыта, көрүөхтэн үчүгэй этэ.

Ол дьыл, балаҕан ыйыгар Мүрү эбэтин Чараҥар оройуон ыһыаҕа атаарыллыбыта.
Саха норуотун бырааһынньыгар П.А. Ойунскай баһылыктаах делегация кэлбитэ. Ол
делегация састаабыгар суруйааччылар Амма Аччыгыйа, Күннүк Уурастыырап, Эллэй,
Архив Абаҕыныыскай, Алексей Берияк уонна саха театрын артыыстара бааллара.

Правительственнай делегация ыһыах кэнниттэн саҥа оскуола тутуллан бүппүт
үөрүүлээх биэчэригэр ыалдьыттаабыттара. Биэчэргэ суруйааччылар бэйэлэрин
айымньыларыттан аахпыттара, артыыстар ырыа, хоһоон толорон, мустубут дьону
үөрдүбүттэрэ.

П.А. ойунскай кылгас буолан баран, дириҥ ис хоһоонноох этиини оҥорбута. Оҕо
үөрэҕи баһылааһыныгар, норуот культуратын сайыннарыыга учуутал сүдү оруолун,
эппиэтинэһин туһунан П.А. Алексеевич анаан-минээн санаппыта: “Республикаҕа өссө
суох үчүгэй оскуоланы туппуккут, ыччакка үөрэҕи биэрэргэ улахан кыахтаммыккыт”, -
диэн этэн туран, оскуоланы тутуспут дьоҥҥо, болуотунньуктарга правительство аатыттан
махталы тиэппитэ.

П.А. Ойунскай «Тыла суох» дьиэтигэр сылдьыыта.

/Гуляев Прокопий Иннокентьевич - диэн икки хараҕа суох кырдьаҕас оҕонньор
ахтыыта./

Мин 1949 с күнүгэр, Мындаабаҕа, Гуляева П.И. диэн икки хараҕа суох, оччолорго
80-наах, сүрдээх сэһэнньит оҕонньору кытта биир дьиэҕэ дьукаахтаһан кыстаабытым.

Кини ити иннинэ илин үрэххэ «Дьэнкиидэ» - диэн күөл үрдүгэр, Тандалыыр суол
кытыытыгар турар саха балаҕаныгар Андросов Семен Семенович (Тыла суох) диэн
киһини кытта дьукаахтаһан олорбута. Ол олордоҕуна куораттан П.А. Ойунскай иккиэ
буолан Тандалаан иһэн, хонон ааспыттара диэн кэпсээбитэ. Ити саҕана Саха Сиригэр
советскай былаас саҥа олохтонон эрэр кэмэ эбит. Кини Платон Алексеевич
көрдөһүүтүнэн, «Улуу Кудаҥса», «Кыһыл Ойуун» диэн о.д.а. норуот сэһэннэрин кэпсээн
биэрбит. Ону Платон Алексеевич сүрдээҕин сэҥээрэн истибитэ диэн кэпсээбитэ.

Ити «Кыһыл Ойуун» былыргыта Күүлэйэптэр төрүттэрэ, дьиҥнээх төрөөн үөскээн
сылдьыбыт сүдү ойуун эбитэ үһү. Ол гынан баран сүрдээх көнө майгылаах, аһыныгас,
иҥсэтэ-обото суох үтүө санаалаах ойуун диэн кэпсииллэрин истэрим. Кини сиэмэх ойуун