Page 20 - Поэзия күнэ

Арай,
Умсулҕаннаах дьон бииһин
Уһулуччулаах сүүрбэһис үйэтин
Улуу бэриэччитэ Советскай Киһи
Уһуктаах ыстаал кыната
Былыттыын бысталаспытын,
Халлаанныын хатыспытын,
Күҥҥэ күлүмнээбитин,
Туох ааттаах тургутуулаах тыла
Толору дьарҕаалаан туойуоҕай,
Ханнык бэйэлээх кэм хаамар атыла
Хардара охсон ылыаҕай?!
Сыллар сындыыстаннахтарын аайы,
Үйэлэр үтүрүлүннэхтэрин аайы
Киһи кэмэ суох генийэ,
Кэриҥэ биллибэт өйүн килбиэнэ
Дьэ ордук дэбилийэн,
Дьэ эбии сэтэрийэн,
Үргэл сулуһу
Үрүт өттүнэн
Үүннэр үүнэ туруохтун ньии,
Араҥас сулуһу
Аһара түһэн,
Аастар ааһа туруохтун ньии,
Уруй-айхал,
Уруй-айхал!