Page 16 - Поэзия күнэ

АЛЕКСЕЙ БЭРИЯК

Москва

Аалыы көмүс кыымнарынан ыһыахтанар
Аламай күммүт сааскы сырдык төлөннөрүнэн
Албан ааттаах Москваны сыдьаайар.

Оҕо сылдьан истибит остуоруйам курдук,
Ол дойду кэпсээҥҥэ киирбит кэрэтин саната,
Ийэ дойдум модун сүрэҕэ тиҥиргэччи тэбэр.
Сарсыардааҥы үүт маван туманы быыһынан
Иннибэр арылла түһэр күн сирин улуу куората,
Элиэнэм курдук килэдийэр киэҥ болуоссат.

Арылла түһэллэр: үтүөкэн бэйэлээх дьиэлэр,
Кырдьаҕас Кремль кыһыл таас эркиннэрэ.,
Кыыһар төлөннөөх рубин сулустара.

Киһи аймах инники суолларын сырдатан
Кытыаста тыгар ол уот дьэргэл сулустары,
Үрдүктэн үрдүк дьиэлэр шпиллэрин тула
Үрдүк дьүрүс халлаан үмүрүйэргэ дылы.

Билигин манна алта чаас сарсыарда,
Сүҥкэннээх өрүстэр түллэр сүүрүктэринии
Уһун уулуссалар долгуйа усталлар.
14