Page 34 - Уйэ анаара тустуу сайдыытыгар

Биһиги, оҕолор, чуолаан мин, бу убайдарым Дьөгүөр, Наум
курдук тустуохпутун олус даҕаны баҕарарбыт! Томтор сайылык
оҕолоро, ыччаттара олус көрдөөх, көхтөөх, түмсүүлээх буоларбыт.
Бары даҕаны, ол кэм сиэринэн, букатын кырабытыттан от-мас
бэлэмигэр, сүөһү-ас көрүүтүн уустук үлэтигэр эрдэ эриллэммит,
ӨҤҮРҮК куйааска буһан-хатан уһаарыллан, будулҕан тымныыга
сылдьан сылгытыйан, сахалыы судургутук аһаан-таҥнан тэтиэнэх
буоларбыт, тумуу, ыарыы диэҥҥэ бас бэриммэт этибит. Иллэҥ
кэммитигэр Орто сайылык (Бэс үрэх) оҕолорун кытта тоҥ сылгы
сааҕынан бырахсан «сэриилэһэрбит», араас илин-кэлин түсүһэр
сырсыылар, мээчик оонньуута бөҕө буолара. Онно барытыгар Наум
инники күөҥҥэ сылдьара, туттар илиитэ хаҥастай буолан олус
сытыытык, күүскэ таба быраҕара. Хайыһарыгар эмиэ бэркэ
сүүрэр этэ, оройуоҥҥа киирэн миэстэлэһэн тахсара. Тустууга
маҥнайгы улахан ситиһиитинэн оҕолорго республика чемпиона
буолбута. Чемпион аалай лиэнтэтин кэтэн турар хаартыската
республика хаһыатыгар бэчээттэммитэ. Онно Наум ситиһиитин
дуорааннаахтык ахтыбыттара, бэлиэтээбиттэрэ, ол инники спор-
тивнай олоҕор эбии хамсатар, өрүкүтэр күүс буолбута чуолкай.
Убайым өссө күүскэ баҕаран, ис-иһиттэн кыһаллан туран дьа-
рыктанар буолбута.
Бу ситиһии иннинэ биир сайын, суол-иис быстан, мэлийэн
турдаҕына Чурапчы интернат-оскуолатын оҕолоро билсэ-көрсө,
араас көрүҥнэргэ күрэхтэһэ кэлбиттэрэ. Тустууга Иннокентий
Ермолаев диэн уол, ССРС 1965 сыллаах эдэрдэргэ чемпиона
Алексей Ермолаев бииргэ төрөөбүт быраата, Наумнуун тустар
буолла. Улахан долгутуулаах, үгүс хамсаныылаах, албастаах
хапсыһыы саҕаланна. Иннокентий уолбут илиитигэр иилистэр,
бу сылдьан хоннох аннынан умсар, атахха түһүтэлиир. Быһата,
араас эгэлгэ албаһы барытын оҥоро сатыыр, ол аайы биһиги
Науммут долгуйбакка, сытан-туран хаалбакка, олус бэркэ утары
туһунна. Бэйэтэ эмиэ атахтыы сатыыр, уҥа-хаҥас илиитин
тардыалаан утары кимэр. Икки тэгил тэҥнээхтэр түбэсиһэн үөһэ-

32