Page 192 - Өксөкүлээх Уола 2009 223стр

Кыракый чооруоһу сөҕөргүн,
Бастакы турааҕы хайгыыргын.
Төрөөбүт дойдугун таптыырыҥ
«Айылҕа кэрэтиэн!» — үөрэриҥ,
Куруутун эн ону бэлиэтээн
Миэхэҕэ көрдөрөр буоларыҥ.
Сүрэҕиҥ чопчута ыччаккын
Эн дьонтон ойуччу тутарыҥ,
Оҕо саас кэрэтин, ырааһын
Сэргээҥҥин үөрэриҥ-көтөрүҥ.
Этэр тыл алыбар үөрэтэн
Үтүөкэн кинигэ биэрэриҥ.
Аан дойду чулуукан дьоннорун
Эн миэхэ арыйбыт эбиккин.
Билигин эрэ өйдүүбүн,
Ыарахан олоҕу ааспыккын,
Ыар баттык сүтүгү сүкпүккүн,
Санааны-оноону көрбүккүн.
Билигин эрэ өйдүүбүн,
Төһөлөөх эр санаа наадатын,
Төһөлөөх олоҕу таптыыргын.
Билигин эрэ өйдүүбүн,
Ыра санааҥ ырааһын,
Баҕа санааҥ дьэҥкэтин,
Эн суобаһын көнөтүн.
Эҥин эҕэлээх дьоннор,
Кыра ычалаах тойоттор
Хара санаа сүлүһүнүн
Сыбаабыттара сыстыбатын.
Улуутуйан устан ааһар
Улуу күн-дьыл өрүһэ
Халаанныы толору томтойон
Түргэнник да устар элэҥнээн.
Өйдүүбүн бүтэһик сырыыгын
Учайга эн миэхэ кэлбиккин.
«Туйаарар барахсан миигин
Көрүстэ ыллаан-туойан», —
Бүтүннүү сырдыы мичээрдээн
Этэриҥ баар курдук билигин.
«Чэгиэ-чаҕаа кэлбит эбит,
Өр да буолла көрбөтөҕүм.
Уу тыыннаах көтөр ити,
Өҥ кэлииһи», — диэбитиҥ.
Хатыҥ чараҥ быыһынан