Page 65 - Кун кууьар хайатыттан

КҮҺҮҤҤҮ САМЫЫР

Курус мичээр үйэлээх соноруттан
Кутаам уота эрэ араҥаччылыыр,
Күннэри-түүннэри тохтобула суох
Күһүҥҥү самыыр маккыраччы ытыыр.

Харахпар мырчыстыбыт быыс хатанар,
Самыыр сынньалаҥа суох сыналыйар,
Өлбүттэри, тыыннаахтары ситимниир
Сүдү тойук курдук үөһэттэн кутуллар.

Күһүҥҥү самыыр курус иигэ хаайар,
Күн сырдыга умнулла быһыытыйар...
Дьэ ол туоххаһыйар кыһалҕаттан
Эн эмтээх саҥаҥ ыарыыбын үтүөрдэр.

Бу сарсыардааҥҥы чэчик дыргыл сыта
Уостубат дьиктилээх эбит, быһыыта.
Бу дуорайар ырыаны истэммин
Көхсүм кэҥиир, ыра санаам улаатар.

Күһүҥҥү самыыр кутар солуурдаах ууну,
Күүскэ түһэр, киэр кыйдыыр хомолтону.
Ардах уута ийэ сири угуттуур,
Ардах уутуттан кэнчээрилиир хонуу.

Эйигин үүннүөх күүһү булбаккабын,
Төһө өр түһүөх уоххун таайбаккабын
Күүтэбин да, мөлтүөх мөссүөн көстүбэт,
Бэйэҕиттэн ыытарга ыксаабаккын.

Togo дохсун майгыҥ уоста намыраан,
Кэннигин эргиллэн көрөҕүн анаан?!
Тобугуруур таммахтаргын истэбин
Аҕам мындыр сүбэтигэр ханыылаан...

Гаврил Андросов тылбааһа