Page 265 - Улуус спордун үйэтиппит учуутал, тренер. Иван Жирков

туһугар күүскэ туруорсаллара. Сыл ахсын кыайан оҥоһуллубат буо-
лан, уулусса олохтоохторо харчынан кыттыһан суолбутун астарар
этибит. Бу бачыымы олоххо киллэрэргэ Иван Михайлович Иван
Ивановичтыын иккиэн күүскэ үлэлэһэллэрэ. Ол иһин ол сылларга
суолбут оҥоһуллубут кэриэтэ буолара.
Кэнники сылларга Иван Михайлович суруйуунан умсугуйан,
биһиги улууспутугар 2022 сылга ыытыллыахтаах Саха сирин но-
руоттарын VIII спортивнай оонньууларын көрсө кинигэ таһааттарар
баҕа санаалаах ахтыылары хомуйан саҕалаабыта. Кини доруобу-
йата төһө да мөлтөөтөр, спорт уонна физкультура эйгэтигэр биир-
гэ алтыспыт 218 дьонуттан хомуйан хаалларбыт эбит. Киһи киэнэ
кэрэмэһэ, үтүөтэ этэ диэн кинини тиһэх суолугар атаарыыга доҕот-
торо эппиттэрэ.
Мин бэйэм спордунан дьарыктаммат киһибин, ол эрэн, бу «Маяк»
түөлбэ дьокутаата буоларым быһыытынан, Иван Михайлович дьиэ-
кэргэнин кытта алтыһабын. Кинилэр кыһынын куоракка кыстаан
баран, сайын бастакы паром сырыытынан дьиэлэригэр тахсан сайы-
лаан киирэллэр. Мүрү эбэбин өҥөйөн олорор буоламмын, харахпар
олорон хаалбыт биир көстүүнү санаан кэллим... Иван Михайлович
олоҕун аргыһынаан Мария Никоновнаны кытта наар хайыһардыыр
этилэр. Саас аайы күнүс Эбэҕэ киирэн сып-сырдык халлаан күөх
спортивнай көстүүмнээх хайыһарынан чэпчэки баҕайытык маҥан
хаар устун дайаллара. Сааскы күн чаҕылыччы тыгыыта маҥан хаар-
га хайыһар кэтэн сүүрэ сылдьаллара кэрэтик да көстөрө.
«Киһи бу олоххо букатын кэлбэт» диэн өйдөбүлүнэн салайтаран,
Иван Михайлович хомуйан саҕалаан хаалларбыт ахтыылара хомул-
лан, кинигэ буолан, бар дьон сэҥээриитин ылыаҕар эрэнэбин.

Валентина Николаевна ШАДРИНА,
13-с нүөмэрдээх уокурук дьокутаата,
Муру нэһилиэгин бочуоттаах тохтооҕо.