Page 149 - Сергей Васильев. Хоһооннор, поэмалар

Хатан ыстаал танкалары,
Өһөгөйдөех өстөөхтөрү
Үлтүрүтэн өрө тэбэр
Үгүс орудиелары
Оҥорон-уһааран таһаарар
Улуу завод буолар эбит.

Москва, —
Эдэр-чэгиэн ыччакка
Эрчимнээх санааны иҥэрэн,
Үүнэр-үөскүүр сүһүөххэ
Үрдүк өйү уган
Күөх кыраай көхсүгэр,
Күннэтэ геройдары көтүтэр,
Күндү биһик буолар эбит.

Сүүс омук сүҥкэннэрэ
Сүрэхтэрин, сүбэлэрин холбоон,
Сөмүйэлэрин төбөтүнэн
Тобулу анньан ааһар
Туочукалара манна баар эбит —
Тойон эрбэҕим сүрэҕинэн
Туруору баттастаҕым!..
Хас бары омук тылынан
Хаҥкыначчы ыллыы сытар
Хатан кыллаах гитара,
Хайа, манна баар эбит, —
Уҥа сөмүйэм уһугунан
Охсуолуу түһэн аастаҕым!..
1944 сы