Page 158 - Сергей Васильев. Хоһооннор, поэмалар
P. 158
Күөх сэбирдэҕи быыһынан
Күндү чыычаах ырыата
Көмүс аалыытын курдук
Күүгүнүү тохторо;
Араҕас отону быыһынан
Араас чыычаах ырыата
Алтай аалыытын курдук
Атыгыраан таргыыра.
Ол көстөр
Эрэһиэҥкэлээх террасаҕа
Эриэн солко куопталаах
Эдэр украинка тахсан,
Ньалҕархай хара баттаҕын
Нарын тиистээх тарааҕынан
Намылыччы тарыыра,
Долгуннаах хара суһуоҕун
Торҕо күөх лентанан
'Гуһахтыы баайара.
Кини
Тэтэркэй иэдэһин имигэр
Киирэн эрэр күн
Кэлбиэнэ оонньуура,
Томтоҕор сүүһүн оройугар
Тахсан эрэр күн
Чаҕыла тыгара.
Дэриэбинэни ортотунан
Тэлиэгэ сүүрэн дьурулуура,
Иһирдьэ сыһыы хонуутунан
Иитиэх хаас кылбаҥныыра.
Ойуур кэтэх томторугар
Оҕо-уруу үҥкүүлүүрэ,
Бастыҥ күүлэ кырыытыгар
Байаан оонньоон иэйэрэ.
Ол эйэлээх олоҕу аймаан,
Уотунан-кутаанан сала-ан
Алдьархайдаах сэрии сыбара
Арҕааттан саба түстэ,
Уот сиэн ’баччалыыра
Улам чугаһаан истэ.
152
