Page 61 - Сергей Васильев. Хоһооннор, поэмалар
P. 61
БЫЛЫТЫ БЫЫҺЫНАН
Ытык хайаны баһынан,
Ыыһар былыты быыһынан
Көтөр аалым дэрбэйэн,
Көмүс күөнэ килбэйэн
«Ньурба» диэки дайаарда,
Мотуор тыаһа айаарда...
Өрүс дьигискэн долгунун
Үрдүнэн, кини кылбааран,
Күндэлэс халлаан толбонун
Күөнүн аннынан куйааран —
Тыаһыы-ууһуу күпсүйдэ,
Курулуу-куугунуу дьүккүйдэ...
Алдан өрүһүн төрдүгэр,
Арҕас хайа күөнүгэр,
Очуос тумул быарыгар,
Оттоох таала сыырыгар,
Сангаар куората көһүннэ,
Салаҥ буруо түлүннэ...
Көтөр «чыычаах» дэрбэйэн,
Көмүс өҥө килбэйэн —•
«Сата» хайатын баһынан,
Саппах былыты быыһынан
Ньурба диэки дайаарда,
Мотуор тыаһа айаарда.
1936 с.
