Page 66 - Сергей Васильев. Хоһооннор, поэмалар
P. 66
тииҥ
Күл курдук өлбөөрбүт
Күкээркэй дьүһүннээх,
Тииҥ кыылбыт мөлбөйбүт
Үтүөкэн бэйэлээх.
Тылбыҥныыр, тырымныыр
Хап-хара харахтаах,
Чэрэҥниир-чөрөҥнүүр
Даллаҕар кулгаахтаах.
Бэйэтин куоталыыр
Суон, хара кылааннаах
Хороҥнуур-субуҥнуур
Кутурук ахханнаах.
Томтор сир арҕаһын
Сарсыарда кэриимниир,
Уһун тиит чыпчаалын
Үрдүгэр чэрэҥниир.
Тиит төргүү мутугун
Күн орто тулалыыр,
Мутуктан — мутукка
Ойуолаан субуҥнуур.
Кини баар бэлиэтэ:
Хатырык тыһыргыыр,
Туорааҕы көмүллүүр,
Тиис тыаһа кэчиргиир.
1936 с
