Page 26 - Кун кууьар хайатыттан

Оо, кыталык, кыталык — күммүт дьиктитэ!
Оо, кыталык, кыталык,
Тулаайахсыйар эбээт
Эн тумна көппүт күөлүҥ киэлитэ,
Хараастан, силбигирэн кэлэр эбээт
Эн тайаарбат буолбут халлааныҥ киэҥ иэнэ.
Эн бааргын —
Уу, хонуу, халлаан килбиэнэ...
Оо, көҥүллээ эрэ, ыраас тарбахпынан
Имэрийэн ылыым эйигин — күммүт дьиктитэ.

АК-БУУРА

Ак-Буура, хоһуун үрэх,
Ыраахтан эргилинним,
Өлбөт мэҥэ уугун иһэн
Сөрүүкээн чэбдигирдим.

Төһө да сылбам быстан
Сындалыйан кэллэрбин,
Хат күүһү-уоҕу ылан,
Эмиэ өрө күүркэйдим.
Илгэлээх олох уута!..
Бааллар уолбат үрэхтэр.
Буруйдуом дуо эйигин
Арыт уолар түгэҥҥэр?

Буруйдуом дуо эн биэрэккин
Таһымнаан дьалкыйбаккар?
Бэйэҕин толук биэрэҕин
Чэлгийэр олох туһугар!

24