Page 180 - Майаҕатта Бэрт Хара

(Ити икки ардыгар Майаҕатта Хардаҕастайы кытары холбоон
үс-түөрт боотуру турбат гына охторор)

Майаҕатта: Үрүҥ тыыммар өстөнөҥҥүт
Хара тыыммар хараастаҥҥыт,
Ааппын-суолбун алдьатаары,
Араллааны тардаары
Адаҕыйан кэлбиккит.
Итинник буоллаҕына,
Идэмэрдээх илбистэнэн
Итии хааммыт тоҕуннун,
Үгүстэн үгүс сууллуоҕа,
Аҕыйахтан аҕыйах охтуоҕа,
Кырыктаах үҥүү күөрэйдин
Сытыы батас кырбастын!

(Уордайбытыгар боотурдар уҥа-хаҥас сырсаллар. Тыгын соҕотох хаалар)

Тыгын: Ытык сир ыччата,
Мааны дойду баатыра
Кыра аайы кыһаллыма,
Кыыһырбыккын киэр кыйдаа
Холуон быһыыга холбоһума,
Омуннаах оонньууга уордайыма,
Оннубутун булунан,
Омукпутун түстүөххэ,
Олохпутун оҥкуллуохха!

(Майаҕатта тулатын көрүнэр. Тыгын илиитин уунар. Майаҕатта илин тутуһар)

Тыгын: Эһиил Туймаарар тумалаах Туймаада хочотугар бу эргин сураҕа иһиллибэтэх
уон улуус уустара сомоҕолоһор Үрүҥ Тунах Ыһыаҕын тэрийиэҕим, истиҥ ыалдьыт буолар-
гын күүтэбин.
Майаҕатта: Оччотооҕуну олоотоон көрбүт суох, көстөн иһиэ.

(Быыс)

14 КӨСТҮҮ

(Туймаада туоната. Ыһыах аһыллыытын сиэрэ-туома.
Тыгын уонна Аабый дъону көрсөн кымыс кута сылдьаллар)

Аабый: Тоҕуоруһуох дьон тоҕуоруста, оонньууларгын саҕалыах баара.
Тыгын: Бэйи, сынньана түстүннэр.
Аабый: Кэлиэхтээх барыта кэлэн, сынньаналларын ааһан сылайан эрэллэр ээ... Ким-
нээҕи эрэ кэтэһэҕин дуу?
Тыгын: Бороҕоттору.
Аабый: Ол иһин даҕаны, Тыгын Тойонум хаһан даҕаны урукку дьылларгар бу курдук
долгуйбуккун көрбөтөҕүм ээ...
Тыгын: Сыс! Былырыын эрэ тыл тылга киирсэн эйэ-дэмнээхтик олоруох буолбуппут.
Ыһыахха ыҥырбытым, ол сиэринэн, дьону өһүргэппэккэ көһүтэр ордуга буолуо.
Аабый: Онтон били Хара? Кэлбэт ини...
Тыгын: Билбэтим. Төһө да быыһык кэмнэргэ бороҕоттору көмүскээтэр, аҥаардас көҥүл
сылдьарын ордорор уол оҕото быһыылаах этэ. Лөгөй дьонугар киирсэн кэлбэтэ чопчу.