Page 138 - Сэрии кэмин оҕолоро 2 кинигэ

ӨЛТӨХ нэһилиэгэ

Докторов Иннокентий Петрович

Мин 1933 с. тохсунньу 17 күнүгэр Уус Алдан оройуонун
Арыылаах бөһүөлэгин Артамаан диэн алааһыгар Докторов Петр
Егорович уонна Аммосова Парасковья Николаевна диэн ыал-
га төрдүс оҕонон төрөөбүтүм. Мин кэннибиттэн өссө икки оҕо
баар.
Сэрии саҕаланыытыгар мин 9 саастаах этим. Кыайар-хотор
дьону барыларын сэриигэ хомуйаннар, үлэһит киһи аҕыйаа-
быта. Ол иһин кыра оҕолору сайынын алаастарга ынах сааҕын
ыраастаталлара, ол аата от үүнэригэр алааһы бэлэмнииллэрэ.
От үлэтин кэмигэр оҕус сиэтэрбит, өйүө таһарбыт. Арыый улаа-
тан баран мунньарга олорбутум. Сэрии бүтэһигэр хара үлэҕэ
барытыгар кыттарбыт. Сэрии саҕаланыытыгар бастакы хомуурга
барбыт дьонтон биир да киһи төннүбэтэҕэ. Мин аҕабын, элбэх оҕолоох уонна үчүгэй
тырахтарыыс буолан, армияҕа ылбатахтара. Сайынын Чараҥ сайылыкка сайылыырбыт.
Ийэм, сүөһү үлэһитэ буолан, аччыктааһын кэмигэр тыыннаах хаалбыппыт. Орто Эбэ
7 кылаастаах оскуолатыгар үөрэнэ сылдьаммын ыалдьан үһүс кылааһынан үөрэнэн
бүппүтүм. Ол кэмҥэ биһиги Халымда диэн Арыылаахтан 3-4 км тэйиччи сытар атааска
олорор этибит, Кыһыҥҥы тымныыга күн аайы онтон сылдьан үөрэнэрбит.
Сут-кураан буолан күөллэрбит уолан хаалбыттара. Саамай дириҥ, хаһан да уолбат
Кэтириискэ чүөмпэтэ олох уолан икки миэтэрэлээх кирилиэс оҥостон уу баһарбыт.
Араас ыарахаттары, эрэйи көрсөн улааппыппыт. Сэрии бүппүтүн туһунан сурах кэлби-
тигэр Орто Эбэҕэ улахан бырааһынньык буолбута.
Олоҕум тухары араас үлэлэргэ үлэлээбитим. Ол курдук тутууга маастардыыр кэммэр
Арыылаах кулуубун, детсады, Балыктаахха 100 миэтэрэ уһуннаах улахан хотону уонна
Бэйдиҥэнэн, Арыылааҕынан чааһынай дьиэлэри тутуспутум. Субуотунньуктар үгүстүк
буолаллара: мас кэрдиитигэр, собуостааһыҥҥа, бэрэбинэ суоруутугар, о.д.а. Кэлин Ба-
лыктаахха арыы собуотугар моториһынан, онтон биэнсийэҕэ тахсыахпар диэри соп-
хуоска электригинэн үлэлээбитим.
Баҕарыам этэ эдэр ыччаттарга ыраас халлааны, эйэлээх олоҕу, хаһан да сэрии буол-
батыгар!

Местниковтар Мария Семеновна
уонна Иннокентий Григорьевич

Өлтөх нэһилиэгэр Мария Семеновна уонна
Иннокентий Григорьевич Местниковтар самаан
сайын биир кэрэ кэмигэр кэргэннии буолан унаар
буруо таһаарбыттара хайыы-үйэ 56 сыл буолла.
Ыал ийэтэ Мария Семеновна 1944 сыллаахха
олунньу 6 күнүгэр 1 Бахсы нэһилиэгэр Толоон
бөһүөлэгэр Семен Николаевич уонна Мария
Михайловна Местниковтар диэн дьиэ кэргэҥҥэ
үһүс оҕонон төрөөбүт. Кыра кылаастарга Толооҥ-
ҥо, Чыаппараҕа, 8-с, 9-с кылаастарга Нам оро-
йуонун Хатырык орто оскуолатыгар үчүгэйдик
үөрэммитэ. Остуол тенниһинэн дьарыктанан,
улууска 1 миэстэни ылбыта. 1963 сыллаахха Иннокентий Григорьевичтыын ыал буол-
буттара. 1966 сыллаахха Бэйдиҥэҕэ көһөн кэлэн, күн бүгүнүгэр диэри хос сиэннэнэн
дьоллоохтук олороллор. Мария Семеновна Бэйдиҥэтээҕи «Чэчир» оҕо уһуйааныгар 38

134