Page 49 - Сахаайа Ермолаева Тымтык күн

28. ЫТЫКТААБАППЫН-ЫТЫКТЫЫБЫН
Ытыктаабаппын —
Үрдүк үөрэхтээҕи арбаан кэпсиир,
Кыра үөрэхтээҕи мыынан сэниир,
Өй төһөтүн дипломунан тэҥниир
Улахамсыгы — намыһах култууралааҕы...

Ытыктыыбын —
Үрүҥ, хара үлэһиккэ тэҥ сыһыаннаах,
Хайаларыттан да муудараһы булар кыахтаах,
Мындыр өйдөөх, көнө майгылаах
Элэккэй киһини — үрдүк култууралааҕы...
Ытыктаабаппын —
Наар байарга эрэ баҕалаах,
Тус бэйэтин эрэ туругурдар сыаллаах,
Харчыга атыыламмыт киһийдэҕи,
Кэрээниттэн тахсыбыт киһини — эгоиһы...

Ытыктыыбын —
Бары дьон тэҥ буоларыгар дьулуһар,
Духуобунаһы, баайы тэҥнээн сайыннарсар,
Кыраҕа-кыаммакка көмөлөһө сылдьар,
Аһыныгас киһини — гуманиһы...

Ытыктаабаппын —
Бөлөхтөһөн, норуоту хайытар,
Илин-арҕаа эҥэрдэһэр, улуустаһар
Чугас көрүүлээх дьону...

Ытыктыыбын —
Иирсэр бөлөхтөрү эйэлэһиннэрэр,
Сомоҕолоһуу идиэйэтин кэҥэтэр,
Ыраах анаарыылаах дьону...

47