Page 31 - Сахаайа Ермолаева Тыыннаах ырыа
P. 31
5.
Арыт сөп сүбэҕин сирэммин-таламмын,
Сүөргүтүк утарсар буруйум үксээтэ.
Суорат-тар мэйиибин убатан бараммын,
Хойдорун ситиһэр сыал-сорук тирээтэ.
Утуйар ууларбын уйгуурпут түүннэрим
Аргыардаах тыыннара аҥылыс гыналлар.
Эһэнэн-бөрөнөн суоһаабыт түүллэрим
Килэйбит тиистэрэ кэтэхпэр суоһууллар.
Олору сэрэйбэт киһилии туттаҥҥын,
Эйэргиир тылгынан аһара сатыыгын.
Оннуккун эрдэттэн билбэтэх аньыыбын
Дириҥник өйдөөммүн, билигин ытыыбын.
* * *
Ыас хара баттаххын маҥхаппыт буруйбун
Хатьшыам суоҕа диэн — суруйдум хоруйбун.
29
