Page 26 - Сахаайа Ермолаева Тыыннаах ырыа

95.

Хаарыаннаах Лирикам Хараҕа
Харааста көрбүккүн! Арааһа,
Салалта өйөөбөт буоллаҕа...
Быыһабыл — норуоппут хараҕа!

96.

Сылыктаан көрдөххө, күөрэгэй
Сыл ахсын аҕыйыыр. “Дьаат” дэлэй!
Төрүөтэ — аһыныы аччаата...
Арай диэ — өйдөөх баай дэлэгэй!..

97.

Эн чахчы харчылаах киһигин!
Теория буолбатах инигин?
Эрэниим: меценат буолаҥнын,
Кыаммакка көрдөрүөҥ кэрэҕин!

98.

Мин бэйэм иэйиибэр — ырыабын,
Хоһооммор — толкуйдуур санаабын:
Санньыарбын, эмиэ да үөрэбин...
Ол иһин бэйиэт диэн буолабын.

99.

Дьадаҥы төрүттэн төрөөммүн,
Мин эмиэ хардаҥ от өҥнөөхпүн.
Арай бу сүрэхпэр, хоһооммор
Кэхтибэт күөх ача өҥнөөхпүн.

100.

Омуннаах эдэр саас таптала,
Муударай кырдьаҕас кэс тыла —
Олохпун арчылыыр. Ол эбит —
Сирдээҕи мин дьолум анала!