Page 74 - Сахаайа Ермолаева Тыыннаах ырыа

14. БАҔ А С А Н А А
Баҕарабын — өй сүрэхтээх,
Сүрэх өйдөөх буолуоҕун;
Оччоҕо эрэ киһи дьиҥнээх
Духуобунаһы булуоҕун...

Чунуобунньук, тоҕо күлэҕин?
Байбыккын ээ, быһыыта?
Маннык киһи хайдах сиэрдээҕин
Хас да үйэ быһаарбыта.
Конфуций киһиэхэ таптала
Эн сүрэххин долгуппат дуо?!
Сирэйиҥ тириитэ сааппат буола,
Оччо халыҥаата дуо?!

«Дура!..» даа?! Бүгүн, хата,
Астыҥ дьиҥнээх санааҕын:
«Манчаары — Спартак буолбатах,
Эн — Жанна Д' Арк буолбатаххын..

Ол эрэн, харчыга атыыламматах
Аммосовтар, Ойуунускайдар,
Бараховтар... Күнү кытта
Хаамсан иһэллэр арҕахпар.

Онтон сыттыйбыт хаппахчым
Аана аһыллар, санаабар.
Саппаҕырбыт саҕах чахчы
Сырдаан барар харахпар.

Норуот хайгыыр көлүөнэтэ
Миэхэ, дьадаҥыга, ордук чугас:
Кинилэр марионеткалар,
Фавориттар буолбатахтар...

Ол иһин эрэлбин кытта
Сылаанньыйа утуйабын.
Күннээҕи олохтон быстах
Быыппастыыбын тулуйабын.