Page 76 - Сахаайа Ермолаева Тыыннаах ырыа
P. 76
к I
Төрдүс кэрчик.
САНААЛАР (поэма)
Олохпут — олоҥхо хайата:
Бухатыыр охсуһар дуораана;
Дьолтон дуу, сортон дуу, хайата, —
Хоторо биллибэт уораана.
Эргиччи күөн көрсүү дьайаана,
Эҥсиллэ тиргиллэр дибилгэн.
Оччонон аһыллар дьай аана,
Тибиинэн тибиирэр тибилгэн.
«Дьылҕа» диэн Байҕалбыт баалыгар
«Сайдыы» диэн оҥочо күөрэҥниир.
Түөрт өттүн хачайдаан баал ыгар,
Түҥнэстэн хаалаары түөрэҥниир.
Күннээҕи ааһарга, быстахха —
Ким эрэ хайҕалы дуйданар.
Барыллаан чиэппэрдии быстахха —
Ким эрэ солото суйданар.
* * *
«Толке» диэн — халтараан хайыһар:
Сыыстыҥ да — тоҥ хаарга элээрдэр.
Уҥа да, хаҥас да хайыһар —
Сэбирдэх, түү курдук тэлээрдэр.
Мин бүгүн ол суолга киирбиттии,
Кулгааҕым курдаттыы куугунуур.
Дууһабар туора күүс киирбит дии:
Тон көҥдөй турбалыы дуугунуур.
