Page 83 - Сергей Васильев. Өлбөт өрөгөй

Аҕыс иилээх-саҕалаах
Аан Ийэ дойдубут
Айгырыаҕа дэһэҥҥит
Аһыакайтан тэйимэҥ!
Айгырыаҕын иннигэр
Араат ньыгыл тааһынан
Акылааттаах дэһэллэр!
Оһуо-оһуо оһуокай,
Эһиэ-эһиэ эһиэкэй!
Сэттэ иилээх-саҕалаах
Сибэтиэй Ийэ дойдубут
Сиҥнэстиэҕэ дэһэҥҥит
Сэлэ иһиттэн тахсымаҥ!
Сиҥнэстиэбин иннигэр
Сибэкки ньүөссүн кырыһынан
Ситэриилээх дэһэллэр!
Оһуо-оһуо оһуокай,
Эһиэ-эһиэ эһиэкэй!
Этэрбэспит уллуҥа
Элэйиэҕэ дэһэҥҥит
Эһиэкэйтэн тэйимэҥ!
Элэйбитин иннигэр
Имиллиилээх тириинэн
Илиисэлиир эдьиийбит
Этиэх икки ардыгар
Эргитээхтээн биэриэҕэ!
Оһуо-оһуо оһуокай,
Эһиэ-эһиэ эһиэкэй!
Олооччубут уллуҥа
Ойуттуоҕа дэһэҥҥит
Оһуокайтан уурайымаҥ!
Ойуттубутун иннигэр
Оҕус көхсүн тириитинэн
Оппуруостуур эдьиийбит
Омурҕан эрэ устатыгар
Уллара охсон биэриэҕэ!
69