Page 46 - Норуоттан тахсыбыт талаан

бойобуой бинтиэпкэлэри, автоматтары туттаран, хайдах иитэри,
хайдах ытары эҥин көрдөрөр уонна хаста да сыал ыттарар этилэр.
Ол кэнниттэн нөҥүө күнүгэр тута сэриилэһэр фроҥҥа ыыталлара.
Оттон сорох дьону нэдиэлэни, ыйы быһа, оннооҕор хас да ый
туталлара.
Дьэ ол курдук мин Мальтаҕа минометнай взводум саллааттарын
үөрэтэ сырыттахпына, 1943 сыллаахха быһыылаах этэ, сайын миэхэ
отучча саха уолаттарын туттаран баран Черемховоҕа ыыппыттара.
Ол уолаттар быыстарыгар Терентий Аммосов эмиэ баар эбит этэ
да, кини биһикки олох билсибэт этибит. Онон ол мин илдьэ барбыт
дьонум ортотугар биир да билэр киһим суоҕа. Биһиги онно таас
чоҕу вагоннарга куруустуохтаах этибит.
Черемховоҕа оннооҕу таас чох үлэһиттэрэ биирдии вагону ку-
руустуурга ырыган, дьүдьэх икки рабочайы туруораллара. Ол дьон
аа-дьуо күрдьэхтэринэн таас чоҕу түгэҕиттэн толору баһан баран
вагоҥҥа куталлара. Көрөргө хайдах эрэ бытаан курдук тутталлара.
Мин биир вагону куруустуурга түөрт эр бэртэрин туруорарым. Ол
дьонум бэрт этиргэн, эдэр, тото-хана аһыы сылдьар дьон, мин
көрдөхпүнэ, күрдьэхтэринэн сабырҕатан олус түргэнник баһа-баһа
куталлара. Ону көрөн баран мин дьонум вагоннары эрдэ толоруу-
һулар дии саныырым. Онтукам киэһэ кэллэхпинэ, киһи саатыах,
анараа рабочайдар хайыы-үйэ толорбут, оттон мин дьонум дьэ
саҥа толороору ыксыы сылдьар буолаллара.
Үрдүк кирилиэстээх таас дьиэҕэ олорорбут. Онно киирэ-тахса
саллааттары көрсө түстэххинэ кинилэр даҕаны, эн даҕаны хайаан
даҕаны чиэс биэрээччибит.
Аҕа дойду Улуу сэриитэ буоларын кытта мин издательствоҕа
үлэлиир олус сымнаҕас-сытыары майгылаах, мээлэ саҥара-иҥэрэ,
мөҕө-этэ сылдьыбат, мөп-мөтөгөр түөстээх, үчүгэй баҕайытык
кылап-халап көрбүт, киһи дьиибэлээтэҕинэ, таах күлэн эрэ кэби-
һэр кыыһы кэргэн ылбытым. Кини миэхэ элбэх оҕону бэлэхтээ-
битэ. Кэргэним Чурапчы улууһун Бахсы нэһилиэгэр, Уус Алдан
улууһун адьас ыпсыытыгар, төрөөбүт этэ. Кэлин билбиппит Терен-
тий Васильевич кини таайа эбит, онон чугас аймах-билэ дьон
буолан хаалбыппыт.
Армияттан кэлэн баран аймахтыы дьон буолбуппутун билэн
үгүстүк хардары-таары сылдьыһар этибит. Араас биэчэрдэргэ
Терентий Васильевич ол Черемховоҕа көрсүһүү туһунан олус
көрдөөхтүк кэпсээн дьону күллэрэрэ.
— Арай Черемховоҕа биир саха лейтенана сылдьарын биһиги
бэлиэтии көрбүппүт. “Бука, биһиги курдук буолбатаҕа, Саха сирин
туһунан туох эмэ сонуннаах киһи буолуо, эн, Терентий, сытыы-
хотуу киһи, кэпсэт, дойдуҥ туһунан сонунна иһит эрэ”, —