Page 38 - Кун кууьар хайатыттан

ЫТЫК СИР

Кыргыыһым сирэ, эн бүтүн норуотуҥ
Былыр-былыргыттан — биир дьиэ кэргэн,
Киниэхэ төрөөбүт дойдутун иэнэ
Ырайга холоонноох эйгэтин тэҥэ.
Тойон аҕам дойдута, эйиэхэ өрүүтүн
Дьылҕабар ситэри төлөспөт иэстээхпин,
Хайаҕа тахсаммын «Манааһым» ап тылын
Сөбүлээн ааҕарбын көҥүллээ, истиэхпин.
Кыргызстаныам, баҕарабын тиһэх чааспар
Эн толук ууруулаах дабааҥҥар ыттыахпын,
Балысхан санаабын самнаран ыытымаар,
Төрөөбүт мин дойдум — мин ытык таҥарам.

АЛГЫЫБЫТ КӨҤҮЛ БИЛИЭНИ

Оҕо-отор саастартан биһигини дьахталлар
Көҥүл эрэ өттүнэн босхо билиэн ылаллар,
Ону билэ-билэбит харабыла суох хааччах
Хатамматах ааннарын төрүт төлө көппөппүт.

Таптал иилиир билиэнигэр уларыйыы күүппэппит
Уонна өссө кинини: «Туругурдун», — дэһэбит,
Дьахтар күөнүн иннигэр сөһүргэстээн тураммыт
Тобукпутун көннөрөн өндөйөрү билбэппит.

Дьахтар бары кыҥкыйын, ирдэбилин, мөҕүүтүн
Умуннарыа хараҕын умсугутар көрүүтэ,
Кириэппэспит эркинэ эргийбитин көрбөккө,
Алгыстыыбыт билиэммит кэрэтигэр бэринэ.

Мария Алексеева тылбааһа