Page 64 - Агабыт туьунан иьирэх тылынан

Китай эдэр летчиктара
Өрө көтөн таҕыстылар,
Улуу норуот уолаттара
Өлүүлүүн охсуһа бардылар.
Корея прожектордара
Өрө чаҕылыһа тыктылар,
Өстөөҕү көрдүүр уоттара
Халлааны тырыта суруйдулар.

Уонна эргийэн ыллылар
Хааннаах өлүү суордарын,
Ону көрөөт эккирэттилэр
«Мигтэр» ол өлүү кыылларын.

«Уоту аһыҥ! Аһыҥ!» - диир
КП иһигэр командир
Летчиктарга радионан,
«Ытыҥ, сууларыҥ, тутатына!»
Сэргэх, сэрэх летчиктар
Эмискэ ытыалаан тиҥийдилэр.
Оо, үөрүү! Ол хара симиэттэр
Үөһэ кытыаста умайдылар.
Биир биир дэлби барыталаан
Салгыҥҥа ыһыллан хааллылар,
Кыһыл уотунан саккыраан
Таҥнары күлүбүрээн түстүлэр.

Дьулуурдаах хорсун летчиктар
Ньиргиһэ көтөн төнүннүлэр,
Утуу-субуу аэродромнарыгар
Оргууй кэлэн түстүлэр.

«Дьол, эйэ туһугар куруутун
Бу курдук өстөөҕү өһөрүөхпүт,
Төрөөбүт ийэ дойдубутун
Суостаах баһаартан быыһыахпыт».
Инньэ диэтилэр доҕотторугар
Кыайан үөрбүт летчиктар.
Китай чулуу геройдарыгар
Уруй эһиэхэ, хорсуттар!
1952 сыл

62