Page 157 - Сэрии кэмин оҕолоро 1 кинигэ

БЭЭРИЙЭ нэһилиэгэ

Ийэм олох кыра сааһыттан туһа киһитэ буолан, дьиэ, хотон үлэтигэр барыты-
гар убаммыт, биирдэ да олорон турбат этим диэн кэпсиир. Үксүн эбэлээх эһэбэр
көмөлөһөөччү аатыран, оонньообутум да аҕыйах этэ диир. Эһэтэ Дегтярёв Иван Ива-
нович, Уус Уйбаан, балыксыттар биригэдьиирдэрэ буолан, ийэм кыра сылдьан биир
ымпыктаах-чымпыктаах түбүгэ сылгы кутуругун сууйан, сүүмэх-сүүмэх тыырыы үһү.
Ол утахтарынан ийэтэ ситии хатан, эһэтэ улахан муҥхалары, илимнэри баайар эбит.
Ол кэннэ ситии кылын кырыйыы эмиэ оҕолор, ийэм уонна таайым Сэмэн Сыро-
ватскай эбээһинэстэрэ эбит. Эбэлэрэ хатаран мунньубут туораах сиэмэлэрин суоруна
тааска эмиэ наар кинилэр тардаллар эбит. Ону таһынан, сэрии дьылларыгар фроҥҥа
ыытыллар куобах тириитин, тыһын имитиитигэр, тэллэй хомуйуутугар, хатарыытыгар
алта сааһыттан үлэлээбит. Холкуос сүөһүтүгэр турнепс ыһыытыгар, үүннэриитигэр
эмиэ үлэлэтэллэр эбит. Сут, сэрии кэмигэр ийэлээх эһэтэ, туунан мундулаан, убайа
куска тиргэлээн, кус-балык суоҕар бутугас, тар, күтэр, кутуйах ордуутун хаһан сиэмэ-
тин бурдуктаан сиэн тыыннаах хаалбыппыт диэн кэпсиир.
Төрөппүтэрим 1956 сыллаахха холбоһон, 45 сыл эйэлээхтик олорбуттара. 3 оҕоло-
руттан билигин улахан кыыстара мин эрэ баарбын уонна түөрт сиэннэммиттэриттэн
билигин үһэ баар, биэс хос сиэннээхтэр. Балыстаах быраатым уонна мин улахан уолум
эдэр саастарыгар, атахтарыгар туран баран олохтон туораан, барыбыт сүрэхлитигэр
оспот бааһы хаалларбыттара.
Ийэм райпо суотчутунан үлэлии-үлэлии Дьокуускайдааҕы кооперативнай технику-
му бүтэрбитэ. Онтон кэлин эргиэн эйгэтигэр буҕаалтарынан, ол кэннэ «Дүпсүн» соп-
хуос экономиһынан биэнсийэҕэ тахсыар диэри үтүө суобастаахтык үлэлээбитэ.
Аҕабынаан иккиэн «Отличник советской потребительской кооперации» бэлиэ хаһаа-
йыннара, аҕам «За доблестный труд в Великой Отечественной войне» диэн мэтээллээх,
ону таһынан үбүлүөйүнэй мэтээллэрдээхтэр, олус элбэх араас таһымнаах грамоталар,
махтал суруктар бааллар.
Ийэм бэртээхэй дьиэ хаһаайката, сатаабата диэн суох, олус хаһаайыстыбаннай. Тыаҕа
олорон куруук сүөһүлээхтэр этэ, куоракка киирэн, кыайар эрдэхтэринэ, оҕуруоттаах,
тэпилииссэлээх буолаллара. Бэргэһэ, үтүлүк, сон, ырбаахы, ыстаан, көстүүм арааһын
барыбытыгар тигэрэ, абырахтыыра. Быысапкаһыт бэрдэ этэ. Кэлин саахымат тигиинэн
үлүһүйэн, элбэх кэрэ сабыыны, суорҕаннары, сыттыктары, олбохтору аттарар буолбу-
та. 1982 с. Дүпсүн ыһыаҕар национальнай көстүүм тигэн 2-с миэстэни ылбыта.
Ийэм кэрэни кэрэхсиир буолан, кыайар эрдэҕинэ дьулуһан туран, норуот маастар-
дарын, худуоһунньуктар быыстапкаларын кэрийэрэ.
Билиҥҥэ диэри хаһыаты, сурунааллары, кинигэлэри күн аайы ааҕар. Быйыл 86 саа-
һын туолла, дьиэ иһигэр оргууй сылдьар, иһит сууйсан, ас астыырга көмөлөһөн, дьиэ
иччитэ буолан абырыыр.
Күндү төрөппүттэрбэр күн сирин көрдөрбүттэригэр, олоххо, үлэҕэ сөптөөх сыһыаны
ииппиттэригэр махтанабын, кинилэринэн сирэйдээн сэрии кэмигэр килбиэннээхтик
үлэлээбит аҕа көлүөнэҕэ сүгүрүйэбин!

Кыыстара, быраас идэлээх
Комиссарова (Охлопкова) Валентина Иннокентьевна,
СӨ доруобуиатын харыстабылын туигуна,
«Гражданскай килбиэн» бэлиэ хаһаайката

153