Page 42 - Сахаайа Ермолаева Тымтык күн

Олоҕум салгыппат, араас
Дьиктилээх буолуон санатан,
Кууһан ылла ып-ыраас
Уон өҥнөөх кустугунан...
...Романтик түүлүм бүтэн,
Эмискэччи уһугуннум.
Реализмҥа баар буола түспүппүттэн,
Ол эрээри, хомойботум.

Утуйуум — мин романтизмым,
Уһуктуум — мин реализмым.
Кинилэр баалларын тухары
Кэрэ буолуо туох барыта.

Олоруоҕум салгыбаттыы,
Толорутук дьиктилээхтик.
Тулуурдаах буолуом ыары уйардык,
Дьулуурдаах буолуом дьолу ситэрдик!!
Күлүм гыммыт Ахтылҕан —
Чаҕылыс гыммыт Чаҕылхан!

19. ҮӨРЭНИҤ
«Киһи — айылҕа оҕото» диэн
Этэллэрин толору ылынабын.
«Киһи — олох оҕото» диэн,
Итиннэ эбиэхпин баҕарабын.

Айылҕа уонна уус олох
Ситимнэрин ким барыта билэр.
Ол эрэн, мин курдук сорох
Эдэр итини көтүмэхтик билэр.

Ол иһин, билиибин дириҥэтээри,
Олоҕу чинчийэ сатыыбын.
Көстүбэт мындыры арыйаары,
Дьон саҥатын тургутабын.

Олох кистэлэҥин көрдөөн
Дьонноох сири кэрийэбин,
Ким эрэ оттомноох, өйдөөх
Харахтарын үөрэтэбин.