Page 38 - Сахаайа Ермолаева Тымтык күн

Криминаллар кэпсэтэллэр:
— Уораргыттан тоҕо байбаккын?
— Дьадаҥылартан эрэ бултаһабын.
— Оттон баай дьонтон «кып» гыннарыаххын?
— Овчаркалара суостара бэрт,
Уонна кистэлэҥ электропроводкаларын
Ханна саһыаралларын билбэппин.
— Бюджеттан уоруоххун?!
— Дуоһунаһым суох ээ!
— Оо, сордооҕу; тойотторго сыһын!

13. КЫТТЫҺЫЫ ЭРЭ КЫАЙЫАҔА

Күннээҕи күүрээннэр, күүгэннэр бааллара
Тыалырбыт өрүһү санатар эбиттэр.
Харсыһыык оҕустар арҕастаах сааллара
Буоланнар, үллэҥнээн, көбүөхтээн эрэллэр.

Урутаан барыска тиксээри куотуһан,
Быйаҥнаах кытылга быһыахтыы күүрэллэр.
Ардыгар арахсан, сороҕор куустуһан,
Мафия долгуннара маҕыйа сүүрэллэр.
Туе бэйэ туһугар дьоллонор соруктаах
Тоҕоостоох түгэни туһанар эбиттэр.
Урааҥхай аймаҕа айанын салгыахтаах
Туос тыытын сордооҕу саарбах дьон эрдэллэр.

Муҥнары туораабыт көмүөллүүр Өлүөнэм,
Бу үйэ күүгэнэ буолантгын уолума.
Саргыгын салгыахтаах сарсыҥҥы көлүөнэҥ
Сандаара сырдыахтаах аналын умнума.
Кыайтарбат буолууну кыттыһан хааччыйар
Кытаанах сокуонун эн айсан кэлбитиҥ.
Тостортон-ойдортон доҕор күүс быысаһар
Добун сыал суолтатын элбэхтик билбитиҥ.
Арҕааҥҥы акыйаан ааҥнаабыт буурҕатын
Араас уон албаһын аттаран тулуй дуу!
Улуу сир киэн туттар муударай Волгатын
Улахан соругар кыттыһан уһун дуу!