Page 88 - Сахаайа Ермолаева Тыыннаах ырыа

Оо, кэбис! Айаным суолугар
Истимиим саа тыаһа эстэрин.
Көрүмүүм — ууһаары дьулуһар
Кыталык кыланан эстэрин.
* * *

Уо! Ура-а! Соһутта, көҕүттэ
Чаҕылҕан ньиргиэрдээх этиҥэ,
Аттыбар уруйдуу мөҕүстэ
Күн сирин үөрүнньэҥ тэтиҥэ.

Алааспын махтана саныыбын:
Кини баар — мин да баар буолуоҕум,
Аар сэргэ алгыспын аныыбын:
Өлбөппүн киниттэн булуоҕум.
Мин, баҕар, ырыаҕа-тойукка
Кэмиттэн кэмигэр биллиэҕим.
Көҥүл, тэҥ холбоспут, хойукку
Хоһооно буоламмын тиллиэҕим.
* * *

Көҥүл диэн бас-батах ыһыллыы,
Кэлтэччи байыы да буолбатах.
Хайдыһыы, үрүҥнүү-кыһыллыы —
Кыдыйсыы — кырдьыгы булбата.

Көҥүл диэн, дьиҥнээҕин ыллахха,
Омукка, баайга да Тэҥнэһии!
Сүдү сыал! Дириҥҥэ, ыраахха
Ыҥырар! Өйүөҕүҥ Тэҥ Иэһи!
* * *
Барыбыт ырайдаах ыратын,
Баҕатын, ама, ким тохтотуой!
Доҕоруом! Тэҥнэһии ырыатын
Дуораччы, күөрэччи тохто туой!

2011-2012 сс.