Page 87 - Сахаайа Ермолаева Тыыннаах ырыа

Эн миэхэ символгын, Убайыам!
Сөҕөбүн дьиҥ бэйиэт талаанын!
Аны да күлүмнүү умайыаҥ!
Санатыаҥ — күрүлгэн халаанын!
Эн — «Демон» уһаарбыт уолаҕын,
«Долгуҥҥа» дуоланнык устаҕын.
Күөмчүттэн күүгэннии уолаҕын,
Ол эрэн эрдээхтик тустаҕын.

Хорсуннук даҕаны эппиккин
Бэйиэт дьон дьылҕатын, кырдьыгын,
Баайсыыга сойуону эппиккин, —
Өй-санаа сабыллар сырдыгын:

«Таптыыбын төрөөбүт уйабын,
Буурҕанан биэбэйдиир биһиги.
Кыйданыы кырыыһын уйабын,
Бэйиэттэр манныкпыт биһиги».
* * *

Арай бу, тоҕо эн, сэр-кэҕэ,
Айарбын көҕүлээн эппэккин?
Түүйдэ дуо эн маһыҥ кэрэҕэ?..
Иэйиибэр иэйиини эппэккин.

Кэскилим ырайдаах ыратын
Сүүрээҥҥэ сүтэрбит курдукпун.
Кыталык бүтэһик ырыатын
Истэрдии санньыарбын, куруспун.

Ыалдьабын! Хараҥа түүннэрим
Үөһүгэр күлүктэр элбииллэр.
Мөкүнү биттэнэр түүллэрим
Тиистэрэ мүлүктээн кэрбииллэр.

Мартынов, Дантес дуу буоланнар,
Сүрэхпин тобулу кыҥыыллар...
Ыгаллар кигиилээх дуоланнар...
Тыынарым, тымырым тыҥыыллар.

85