Page 160 - Майаҕатта Бэрт Хара

(Халҕан аһыллар тыаһа иһиллэр. Сыарҕаҕа оҕотун соспутунан
Эбэрикээн киирэн кэлэр. Чочумча чуумпурар)

Эбэрикээн: Аҕа кырдьаҕас! Модун күүстээххин, эмтиир алыптааххын ыраахтан истэм-
мит, алтыспыт дьонум-сэргэм барыта эйигин эрэ ыарыылары кыйдыыр, иччилэри кэпсэтэр
уонна абааһылары кыайар кыахтаах диэн, бу тибиилээх мочоҥ суолунан күнү быһа айаннаан,
уолбун кытары кэлэн турабын! Чопчулаатар чопчум, кыра уолум бу, атаҕар туран хаампатаҕа
аҕыс сылыгар барда. Эрэйи, мускууру барытын көрдүбүт, Сир Ийэ чэлгийэн турар кэмигэр
бэрсибит туһалаах отун, көдьүүстээх үүнээйитин эмп оҥостон амсайдыбыт ини, тутуннубут
ини, туох даҕаны туһа тахсыбата. Буулаабыт абааһыта арахсан биэрбэт эбит, ыбылы кууспут
ыарыыта хоҥностон биэрбэт эбит! Көмөлөстөххүнэ эн эрэ көмөлөһөр тустааххын, абыраа-
таххына эн эрэ абырыыр кыахтааххын!

(Чочумча чуумпурар. Сабыстай Ойуун сыарҕаҕа чугаһыыр,
чукнуур, тирии такаһы сэгэтэн көрөр)
Сабыстай Ойуун: Б-рр!

(Иһин түгэҕиттэн тыас таһааран курдъугунуур)

Сабыстай Ойуун: Барахсаны сиргэ төкүнүйэн, күн сырдыгын көрүөҕүттэн өттүктэрин
Дьаҥ Дьаралык абааһы уонна кини ини-биитэ Дьолту Үөдүгэн быһа эпчэрийэн ааспыттар
эбээт...
Эбэрикээн: Кини киһи буолан, эр бэрдэ дэтэн, биир эмэ күн сүүрэн элэгэлдьитиэ диэн
эрэлим уостубат! Ытык кырдьаҕас, Сабыстай Ойуун, эн эмтээтэргин, үтүөрүө этибит дии?
Сабыстай ойуун: Чэ, туох кыалларынан. Оҕо манна сытгын, эн арыый да улаҕаа диэки
бар...

(Ойууннаан кыыраары, дүҥүрүн хостоон таһааран, салааскылаах оҕо тула холоруктуу
эргийэр. Онтон тохтоон, уоскуйан ылар, турукка киирэр)