Page 8 - Н.А. Орлов бэйэтин туьунан

таптайда. Ити курдук хас да саллааттары кытта кэпсэтэн баран, хаһаарымаҕа сиргэ олоро
түһэн баран, муҥха тахсар тонатын буорга суруйан уруһуйдаабытынан барда. Онно
ийэтин делинэн кылаапан оҥорор туһунан этии киллэрэн туран, солдаттар дьүүллэригэр
туруорда. Ол манныктан: биһиги муҥхалыыр күөлбүтүгэр ХалкинГол, Аршан, Керулен
өрүстэр түһэр сирдэригэр күһүнүн кыдьымах киириитин саҕана муус дьапталҕата үөскээн
муҥха сырыытын мэһэйдиир. Оччоҕо муҥха тохтуур. Ол кэмҥэ киирбит балык төннөн
тахсар. Ол төннөр балыгы тохтоторго аналлаах кылаапаны оҥотторорго этии киллэрбит
эбит. Ол этии биир тыла суох толоруллубута уонна ол кырдьык туһалаабыта.

Родион Яковлевич муҥха тахсыытыгар эмиэ хаста да кэлэ сылдьыбыта. Чардаакка
тахсан мөхсөр бөдөҥ балыктар кутуруктарынан оонньоон маршал таҥаһыгар ууну саба
ыстахтарына олус диэн ис иһиттэн сөбүлээн үөрэрэ-көтөрө. Кини уһун тимир
күрүчүөгүнэн балыгы хайыытыттан иилэн соһон таһаарара уонна биһиэхэ сүбэлиирэ.
Балыгы хаһан да күрүчүөгүнэн эти-батары охсон таһаарбат баҕайы, балык этэ
бааһырдаҕына онтон балык этэ буорту буолар диирэ. Оттон биһиги судургулуу
күрүчүөгүнэн балыгы тобулу охсон судургулуу таһаарарбытын сөбүлүүрбүт. Аны
муҥхабытыгар олус элбэх ракушкалар кэлэллэр. Ону маршал ити олус үчүгэй минньигэс
ас, итини астаан сиэххэ наада диирэ. Оттон биһиги итинтэн сиргэнэрбит.

Биирдэ Родион Яковлевич сайын кэлбитэ. Ити кэмҥэ Бунриур күөлгэ хаастар
саараан көппөт буолан баран, бөлөҕүнэн уста сылдьар буолаллара. Ону көрөн биһиги
ытыахпытын олус баҕарабыт. Биирдэ стрельбищеттан ордорунан ботуруон
мунньунаммыт хаастары ытыалаабыппыт. Онуоха тутатына монголлар застаабаларыттан
кэлэн биһигитини быччаччы тутан илдьэннэр застаабаларыгар хоннорон турардаахтар.
Онтон кэлин хаастарга чугаһаабат буолбуппут. Итинтэн японнар границалара чугаһа,
хаһаарымалара көстөн турара.

Малиновскай биирдэ кэлэн ротабыт командирыттан үчүгэй ытааччылары ылан
хаастата ылбыта. Ол иһигэр мин эмиэ кииристим. Чугаһаат команданнан биир тэҥҥэ
түһэрдибит. Хаас бөҕө өллө. Оннук хас да бөлөх хаастары өлөрөн чааспытыгар
төнүннүбүт. Ити ытар кэммитигэр застаабаттан ким да кэлбэтэҕэ. Арааһа маршаллары
кытта кэпсэттэхтэрэ буолуо. Хаһаарымабытыгар кэлбиппит маршалбыт суоҕа. Рота
саллааттара хаастарбытын икки күнү быһа үргээннэр абааһы көрбүттэрэ. Киэһээ
остолобуойбутугар хаас этин тото-хана сиэппиттэрэ. Ордугун кыра мас буочукаларга
тууһаан уурбуттара. Ол буочукалаах хаастар ханна тиийбиттэрин билбэтэхпит.

Малиновскай кыһын кэлиитигэр генаральскай папахалааҕа, хара сигейка
курткалааҕа, уһун таба тыһыттан тигиллибит күрүмэ унтыылааҕа.

Ити курдук забайкальскай военнай округ командующайын, маршал Родион
Яковлевич Малиновскайы хаста да чугастан уу харахпынан көрөн, саҥатын истэн
турардаахпын. Мин харахпар ортону үрдүнэн уҥуохтаах, хара бараан дьүһүннээх киһи
курдук өйдүүбүн.

Илиҥҥи фроҥҥа

Фашистскай Германияны кыайыы кэнниттэн, илин империалистическай Японияны
кытта сэрии саҕаланыахтааҕын туһунан саллааттар ортолоругар кистээн кэпсэтиилэр баар