Page 9 - Уйбаан Бахсылыырап. Сэрии кэмин оҕолоро - эйэлээх олох уустара

СЭРИИ кэмин оҕото

Уйбаан Бахсылыырап

Ийэтин эмиийин үүтүн билбэтэх
Иринньэх от-мас илиилээх-атахтаах,
Тар, үөрэ хааһыны тото сиэбэтэх,
Быстара сыстар да, өспөт дьылҕалаах —
Бүгүҥҥү күҥҥэ сааһырбыт көлүөнэ,
Сэрии суоһар кэмин — ордубут оҕото!

Төгүрүк остуол атаҕар бааллыбыт,
Балаҕаҥҥа соҕотох ытыы хаалбыт,
Ийэтэ үлэттэн кэлэрин кэтэспит,
Өрүү аччыктаан ытаабыт-соҥообут,
Инчэҕэй тирбэҕэ быстыбатынан
Киһи буолбут — сэрии кэмин оҕото!

Аҕата уоттаах сэриигэ барарын
Ийэтин халадаайыгар сөрүөстэн
Аартыкка аймана, сайыһа хаалбыт,
Күн ахсын аҕата кэлэрин күүппүт,
Кинини көрөөрү өр да өр кэтэспит,
Суолу манаабыт — сэрии тулаайаҕа!
Солооһуҥҥа оҕус муннун соһуспут,
От-мас үлэтигэр төһүү күүс буолбут,
Аһыҥа үөннүүн “өстөөх” диэн охсуспут,
Сырдыгы, хараҥаны улахан дьоннуун
Үлэҕэ сылдьан дьиҥ-чахчы тэҥнээбит,
Үөрэхтэн маппыт — сэрии кэмин оҕото!
Уу ньуулдьаҕай оҕо эдэр сааһыттан
Өлүүнү-сүтүүнү билбит, көрсүбүт,
Көмүскэтин уутун элбэхтэ тохпут,
Кыһалҕаттан эрдэлээн сиппит-хоппут,
Үлэнэн, үлэнэн эрэ олорбут
Дьоһуннаах Киһи — сэрии кэмин оҕото!
Оҕо сааска оонньуу сылдьыбатахтар
Бүгүн оҕонньор, эмээхсин дэтэҥҥит
Элбэх сиэн эһэтэ, эбэтэ буолаҥҥыт
Кыайыы үбүлүөйүн үөрэ көрсөҕүт!
Ол эрэн сүрэхтэн, дууһаттан сүппэт
Сэрии куруһа — сэрии кэмин сыллара!
2010 с. ыам ыйа