Page 81 - Сахаайа Ермолаева Тыыннаах ырыа

Чиэһинэй — акаары аатырар...
Чиэһин да атыылаан байааччы —
Билигин да өйдөөх аатырар...
Оннук дьон үөһээнэн дайааччы.
Соллоҥноох дьон куруук урутаан
Сир ахсын бөлөхтөөн киксээччи.
Кылааттаах ампаарга урут аан
Аһааччы — өҥ баайга тиксээччи.

Кыайбаккын — оннук дьон саайкатын,
Арыйар даҕаны сэрэхтээх.
Былдьыа, бэл, маҕаһыын саайкатын...
Өйөнөр тииттэрэ — кэрэхтээх.
* * *
Мөккүөрдэр ыйдара-хайдара
Кыдьымах муус буолан хамнаата.
Уорсуһар өй-санаа хайдара
Уҥа да, хаҥас да тамнаата.

Оо, иҥсэ! Үрдүккэ куйаара
Көтүөхпүн бопсоҥнун сордуугун.
Көҥүлгэ көҕүйүүм куйаара
Кэҥиэҕин — тор суолбун тордуугун.

* * *
Мин — санаа салайар кыыһабын:
Үөрүүттэн — күрүлгэн буолабын;
Хайҕалтан — сарыаллыы кыыһабын;
Самныыттан — уу курдук уолабын.

Үксүгэр — адьас туос сатыыбын:
Ындыылаах ат курдук ырабын.
Толкуйдаан тобула сатыыбын:
«Ситиэм дуо баҕабын-ырабын?..»

Ол кэмҥэ — туундара табатын
Сүтэрэн мунчаарбыт каюрбун.
Хайысхам сыыһатын, табатын
Быһаарбат хараҥа ойуурбун.

79