Page 82 - Сахаайа Ермолаева Тыыннаах ырыа

Иннибит — таас Дьааҥы хайата?
Тоҥ хаара?.. Ааҕааччы быһаардын:
Булчуттуу сылыктаан, хайата
Сөптөөҕүн хос суоттаан таһаардын.

«Олохпут эрийэ-буруйа
Хаамыыта — система буруйа...»
Сорохтор итинник дэһэллэр,
Логика сокуонун кэһэллэр.

Бэйэни алҕастан быыһыырга,
Ыйытыым: «Эн ааспыт быыбарга
Бырачыас биллэрэн сытынныҥ?..
Эбэтэр сотордуу кытынныҥ?..».

Маркстыы эттэххэ: “Биһиги,
Барыбыт суобаспыт хайдаҕый?..”
Сирэбит сэбиэскэй биһиги?..
Сиилиибит аны кэм хайдаҕын?..

Быыбардаах политик табаарыс!
Бас-баттах барыыга хоруйдаа:
Бастатан бэйэҕин быһаарыс...
Онтон дьон кыратын буруйдаа.
* * *

Саха дьон кэскилэ хайыаҕай?..
Көмөтө суох ууһуо бэйэтэ?..
Аргыары тугунан хайыаҕай?
Доҕордуу сыһыана?.. Эйэтэ?..

Доҕордуу, сомоҕо буолууну
Ханнык күүс имири сотуоҕай?!
Өйүнэн өлбөтү булууну
Абааһы да хайаан хотуоҕай?!

Мэһэй баар! Наар ордо сатааһын
Мэйиигэ тимирдии тиргиллэр.
Киитэрэй буолууну сатааһын
Эгоист буолуунан эргиллэр.