Page 110 - Элэс Боотур Бүөтүр Оҕотоойоп

3640 Үһүө көмөлөөн үөмэхтэһэн,
Кыайан-хотон эрэргититтэн
Киһиргээн, киэбирэн
Кирсигит быстаары турар дуо,
Кэрэдэктэр ?!
Айан киһитин аралдьытымаҥ,
Суол киһитин тутумаҥ,
Тарҕаһа тардыҥ,
Тыыҥҥытын иһиллиэм,
Тымыргытын тардыам,
3650 Дьиккэрдэр», — диэтэ.

Онуоха туран
Улахан убайдара
Уот Урбалдьын обургу
Охсуһарын быыһыгар
Саҥалаах буола сырытта.

Уот Урбалдьын

«Аар-дьаалы,
Аар-татай ини, оҕолоор!
Мин бэйэлээх
Кэргэнинэн кэмчи буолан,
3660 Кылааннаах-уһуктаах
Кыыс Ньургун бухатыыры
Тэҥнээҕим буолуо диэн,
Ойох ылан
Олох олороору
Эйэнэн этэн көрбүппэр,
Олох буолуммакка
Охсуспуппут үс төгүрүк сыла
Оруобуна бүгүн томтойо туолла.
Таһыйан тараах иэннээн,
3670 Кумалаан кулугур кулгаахтаан,
Ат курдук айааһаан,
Сылгы курдук сыһытан,
Ахсымын аччатан,
Дохсунун торутан,
Тэллэххэ сытар