Page 168 - Элэс Боотур Бүөтүр Оҕотоойоп

Элэс Боотур обургу
Кэлэн баран
Кэннинэн кэхтиэ дуо,
Үс бүүрүктээх
Үөдэн дьөлөрү
Түҥкэтэх түгэҕэр
Түҥнэри түҥкэлийэн
5190 Түһэ турда.
Киирбэхтээн иһэн
Кэннин хайыһан көрбүтэ:
Күн айыы сирэ
Үөлэс үүтүн курдук
Хоролҕон хара аартыгынан
Күн курдук
Күлүмүрдүү хаалла...
Борук-сорук,
Бүдүө-бадыа
5200 Буом сиргэ тиийэн
Бүдүйэн көрбүтэ:
Өлөрсөр-өһөрсөр
Өһөхтөөх үҥүү-батас
Өргөһө-кылаана
Өрө гына
Үүнэн турар
Үөрбэ долоҕодоһун аартык
Аат айаҕын курдук
Аҥайа сытар эбит.
5210 Үрдүнэн көтөөрү
Үөлүллэн өлбүт
Үтүмэн үгүс киһи
Үөн-көйүүр аһылыга буолан,
Кур унуохтара
Кубарыйа кууран,
Көтөөрү гыммыты
Күлүү гынардыы
Ырдьаһан тураллар эбит.
Элэс Боотур
5220 Этэ саласта,
Куйахата күүрдэ,
Кэннинэн чинэрийдэ.