Page 140 - Неизвестное название

Кыҥнайа-кыҥнайа
Кыҥастаһан кыччаҥнаата,
Ол гынан баран
Үрдүк тумул саҕа
5750 Үллэх гынна,
Туруук хайа саҕа
Дуоллас гынна,
Саманнык диэн
Саҥалаах-иҥэлээх буола
Нүһэр үлүгэрдик
Лүҥкүнэтэ турда:
— Буойака, буойака!
Бу сис хайа тыалар
Иччилэрэ буолбут
5760 Тимир Лөһүөрдээх
Эн диэтэх киһи
Хайа дайды хапчаҕайыттан
Халты харбатан,
Туох дойду дьулаҕайыттан
Туура харбаан,
Тутан аҕаллыҥ,
Нойон киһиэ!
Мантыкаҥ баара
Ытык киһи ыамата,
5770 Төрүт киһи төрүөҕэ эбит,
Эн, нойоон,
Бу орто туруу дьоҕул дойду
Улай дьэҥкэ киинигэр
Олохсуйан үөскээбит
Айыы хаан аймахтарын
Албан ааттааҕын
Араҥас сиэр аттаах
Алаатыыр Ала Туйгун
Уоҕан оҕото
5780 Тустуулаах Дьуруо Бөҕө диэн эбит ээ.
Нойоон, ону баара
Уоран-талаан
Аҕалбыт буоллаххына,
Ол күдэн бөҕө күүстээх,
Модун бөҕө моонньоох,
Бухатыыр сурахтааҕа.
Ириэнэх суолгун ирдээн,
Тоҥоттоох суолгун тордоон,

- 139 -