Page 177 - Неизвестное название

Топпотох туулайда,
Аһыахтааҕы аһаабатах,
Сиэхтээҕи сиэбэтэх,
7340 Ордук оботурдулар,
Эбии иҥсэрдилэр.
Алдьархайдаах аллараа дойду
Абааһыларын атамааннара,
Көстүбэттэрин күтүрдэрэ
Нүһэр бөҕөлөрө
Дуулаҕа бухатыырдара
Тустуулаах Дьуруо Бөҕөнү
Тула эргийэн
Турунан кэбистилэр.
7350 Өһүөннээх үлүгэрдик
Өтөрү көрдүлэр,
Хатааннаах баҕайытык,
Хатааһын чолбонун курдук
Хаһылыччы көрдүлэр.
Саманнык диэн
Саҥа саҥаран,
Сатарыһан турдулар:
— Буойака, буойака!
Бу орто дойду
7360 Дьорҕоот санаалаах,
Дохсун бардам
Уол оҕото
Тустуулаах Дьуруо Бөҕө
Биһиги диэтэх дьон
Түөлбэлээх түһүлгэбитигэр,
Ытык ыһыахпытыгар
Ыалдьыт буолан ырҕаары,
Хоноһо буолан суотуйаары,
Кэлбит эбит буоллаххына,
7370 Тутуһуохха дьороҕой илиилээх,
Харбаһыахха хапсадай тарбахтаах,
Халбархай таһаалаах,
Мөҕүлдьүөр ойоҕостоох,
Бөҕө түөстээх
Дуолан бухатыырдар,
Нүһэр бөҕөлөр,
Адьырҕа атамааннара
Биһиги диэтэх буолабыт.
Хаспытын кытта
- 176 -