Page 196 - Неизвестное название

Муҥурун булларбакка,
Муус Кудулу байҕал
Иччитэ буолбут
Ардьамаан-Дьардьамаан бухатыыры кытта
Охсуһуу гиэнэ
Улаханын охсуһаннар,
8160 Орто дойдуну
Тордуйалаах* уу курдук
Долгуһуппуттарын иһин,
Атыйахтаах уу курдук
Дьалкыһыппыттарын иһин,
Аҥар өртүн
Иҥнэри үктээбиттэрин иһин,
Дьөһөгөй айыы
Төрдүттэн түһэннэр,
Сүдү дьүүлгэ түбэһиннэрэн.
8170 Күтүрдээх буруйу буруйдаан,
Күүстэрин аҥаарын
Күрдьэҕинэн бастарбыттарын
Истибэккин дуо?
Көрүнньүк көҕүс дьон
Көппөҥнөһөн хаалбыттара.
Кэллэҕинэ даҕаны
Киһи аҥарын кытта
Күөн көрсүбэт,
Күрэс былдьаспат
8180 Кус мөлтөх,
Куһаҕан уолу төрөппүтүм
Диигин дуо?
Аллараа дойду
Ааттаах адьырҕата буолбут
Мин диэтэх киһиэхэ
Кыыһын биэримээри,
Хадьардаһан-утарсан
Кыйахыыр буоллаҕына,
Кылгас уҥуоҕун кыдьымахтыам,
8190 Уһун уҥуоҕун урусхаллыам,
Ааттаах бухатыыры
Агдахатын адаарытан,
Аатым-суолум үрдээн,
Аатырыам сураҕырыам этэ.
Хатан харытын унуоҕун
Куортук анньыныам этэ,
- 195 -