Page 139 - Сергей Васильев. Өлбөт өрөгөй

Эрилийэр сытыы хараххар көрөбүн
Ийэ-аҕа күлүмнүүр мичээрин.
Көрөбүн: Ангара, Енисей ньуурун,
Сүүрүккэ кутуллан уот оонньуурун.
Көрөбүн: түүн сандаара сырдыырын,
Иэннээх киэҥ Сибирь эйгэтэ тупсарын.
Истэбин: тутууга тимир лиҥкиниирин,
Хатан ыстаал тардыллан лыҥкыныырын.
Истэбин: солко торҕо суугунуурун,
Хонуу устун гармошка куугунуурун.
Истэбин: суорума тайҕам солонорун,
Ленам кытылыгар паровоз кыланарын.
Истэбин: алаас, толоон ыллыырын,
Аан дойду бүтүннүүтэ айхаллыырын.
Эн, партия съеһин делегата,
Эт, уруйдаа — дьон-норуот чиэһэ, албан аата!
1956 с.

ПОЭТ БАҔАЛАРА
0
Саймаарар, сырдык санаабынан
Сандаарар саһарҕа кынаттанан,
Күн айыы кыталыга буоламмын
Күндээрэр күөх халлаачы кырсынан
Күөрэйэ-кылбайа көттөрбүөн.
Кыыһар былыт оһуутугар тохтоон,
Кылбаарар кынаппын кыһыгыраччы тэбэнэн,
Кырылас үрүҥ көмүс кыырпаҕынан
Кыраһалыы түһэн аастарбыан.
Дьапталҕа ньыгыл таас арҕастаах
Дьааҥы үрдүк очуоһугар түһэн,
125