Page 162 - Сергей Васильев. Өлбөт өрөгөй

Аргыардаах Амма тоҥ буоругар
Андаҕайбыт чадаан тыллара
Өркөн-төлөн буолан
Өстөөҕү үлтү сабаабытын;
Силлиэрбит кыраай Сибирь уолаттара,
Советскай Армия хорсун буойуттара
Аҕа дойду алдьархайдаах кэмигэр
Аймах-хаан норуоттарын иннигэр
Аан-дархан андаҕары ылынан,
Абалаах-саталаах тылы саҥаран,
Уоту-кутааны ортотунан сүүрэн,
Уһуурар буулдьаны утары киирэн
Дьон-норуот өстөөҕүн умса уурбуттарын,
Дьол-соргу былааҕын өрө ууммуттарын!
Киэҥ аан ийэ дойдубут барыта билэр,
Ким барыта истэ сөҕөр:
Аан дойду аатырар дыбарыастара,
Айыы дьонун төлөннөөх ойуулара
Алдан, Индигир кыһыл көмүһүнэн,
Айхаллаах киһи аймах күлүм мичилинэн
Күлүмнүү-күндээрэ киэркэйбитин,
Күндү-лоһуор ойуунан дьэргэйбитин.
Урааҥхай сирин аатырбыт алмааһа,
Оонньуур уоттаах күндү тааһа
Улаҕаа сирдэринэн чаҕылыйбытын,
Улуу бухатыырдыы кини сураҕырбытын...

Оэ, улуу биэс уонус күүрээннээх сыл,
Эн, улуу биэс уонус бухатыыр сыл
Бүгүн,
Көмүс куйаххын кэтэн,
Күн дьонугар үөрэн-күлэн
Чаҕылыйан тиийэн кэллиҥ!

Уруй-айхал эйиэхэ,
Улуу бухатыыр сылга!
148