Page 13 - Сахаайа Ермолаева Тымтык күн
P. 13
Күүгэнтэн тумнаста дьарыллан,
Күүрээҥҥин өһүлэн бохтума!
Сатараа саҥалыы арыллан,
Сайыалаах тайыыттан охтума!
4.
Нахааллар тигиилии-тигиилии,
Саһаллар, чуумпура таалаллар.
Эрбиини сытыылыыр игиилии,
Кэтэххэр тиистэрин аалаллар.
Ол сахха үөһэтик дайаргар
Айар кут — ол эрэ сарыаллыа.
Үйэлээх хоһоону айаргар
Муударай санаанан арыаллыа.
5.
Иэйиинэн эгдэччи күүрбүччэ,
Сырдыктык үөрэбин кыраттан.
Кыайтарыы кырыыһын үүрбүччэ,
Үрдүүбүн ырайдаах үөрүүттэн.
Бу курдук олоруом чэбэрдик...
Тумнуом бэрт былдьаһыы быыстарын.
Дьулуһуом күүспэр күүс эбэрдик...
Уйдарбыан — дьон үөхсэр ыыстарын!
6.
Айылҕа холкутук таалыыта:
«Умун, — диир, — бүгүҥҥү майдааны».
Сарсыарда күн көмүс аалыыта
Аһарар ханнык да айдааны.
Күннээҕи биир түгэн сахсаана
Чиҥ буолуу үгэһин баһыйбат.
Элбии тур мин үөрүүм ахсаана!
Сүрэҕим хам тутан аһыйбат.
11
