Page 15 - Сахаайа Ермолаева Тымтык күн

10.

Күөнтэһии күүһүттэн түүрүллэн,
Дьоҕурум тумаҥҥа сууланна.
Хаарыаннаах дьаныарым үүрүллэн,
Хараҕым харааста ууланна.
Тулуй дуу, мин иэйиим нарына,
Удьурҕай буолаҥҥын кытаата.
Кырдьыгар эрэлин арына,
Сүрэҕим ыраастык ытаата.

11.

Айар ап дуоһунас соруурун
Истибэт. Ол иһин мөҕүллэр.
Билиммэт ким харчы оруурун;
Көнө сиэр тостоору өҕүллэр.

Арай дуо?! Ааҕааччы хайҕала
Дууһатын байытан «харчылыыр».
Дьон сырдык уруйа-айхала
Охсууттан, охтууттан арчылыыр.

12.

Мин бүгүн санаабар саһаммын,
Кийииттиир кыыс куоҕа дьүөрэбин.
Долгуйбут толкуйбун аһаммын,
Бүтэйдии нүөлүйэн үөрэбин.

Төрүөтэ?.. Таптаабыт Дуоланым —
Кэрэхсии көрбөхтүүр хараҕар...
Сыыстым ээ, бадаҕа?! Уоланым
Хараҕа атыҥҥа араҕар.

13