Page 17 - Сахаайа Ермолаева Тымтык күн

16.

Ардыгар суруйуум, кирдиэхтии,
Айаас ат айана буолбахтыыр:
Аан дойду улуутун ирдиэхтии,
Үрэхтии таһымныыр, уолбахтыыр...

Кэнники!.. Айбытым бэйэтэ
Айааннаах айаммын салгыаҕа,
Күн сылаас сыһыаннаах эйэтэ
Үйэлээх чуумпунан алгыаҕа!

17.

Сороҕор чысхаан тыал кырыата
Хоһооммор кыбыллан тустуоҕа.
Онно да сүрэҕим ырыата
Үрүччэ тымырбар устуоҕа.

Кыталык үҥкүүтүн көрбүттүү,
Кытылга кылбаҥныы сүүрүөҕүм.
Кутааҕа чаанньыкпын өрбүттүү,
Самнарыы ыар тыынын үүрүөҕүм.

18.

Уус киһи талаанын бэрдинэн
Олоҕу табатык туһанар.
Далайга мындырдык эрдинэн,
Өйүгэр сөлбөтү уһанар.

Мэлдьитин муударай буолууттан
Соругун туйгуннук толорор:
Быыһанар чычааһыы уолууттан, —
Дириҥээн, дьоллоохтук олорор.

15