Page 30 - Сахаайа Ермолаева Тымтык күн

2. ТӨРӨӨБҮТ ТҮӨЛБЭБЭР ТАПТАЛЫМ

Дойдубун, саараҥныы турбакка
Дьоруойдуу киэн туттан туойабын,
Үбүлүөй тылынан буолбакка,
Үөрүүбүн иэйиинэн кыымныыбын.
Үчүгэй даҕаны үрэҕим
Куйааска сөрүүннүк тыынара;
Эриэккэс даҕаны сүрэҕим
Кэрэттэн нүөлүйэн ылара.
Эһээкэй оҕо саас эргиллэн,
Эмиийи эмпэхтээн эрэрдии,
Оҕолуу ыраастык түмүллэн,
Чаҕаара ыллыыбын, күлэбин!
Бу эбит дойдубар тапталым —
Кынаттаах аанньаллаах аналым —
Сүрэҕим тэбэрин тухары
Олоруом кинини кытары!

3. ӨРҮСКЭЛЭҺИИ

Үөр табаны,
Үөр сылгыны
Урутаан тардаары,
Оол! Бөрөлөр —
Субуруннаһан,
Сундулуһан эрэллэр.

Бөх аһын
Бөһүөнэҕэр, сыалааҕар тиксээри
Хаамаайы ыттар
Хааннаһан эрэллэр.

Ол курдук аттыбар
Оботтоох-иҥсэлээх дьоннор,
Халыҥ харчыга тиксээри,
Хараҥа түүннэргэ
Илэ абааһы буоланнар,
Ииригирэ сүүрэллэр...

28