Page 32 - Сахаайа Ермолаева Тымтык күн

5. СУТААҺЫН АҺЫҤАЛАРА

Аҕам кэпсиир миэхэ:
Сэрии, сут саҕанааҕы аһыҥалар
Харахпар көһүннүлэр:

Кинилэр — бука барылара
Тот уонна эмис этилэрэ —
Кынаттара кытархайдара,
Истэрэ күөҕүнэн күүгэннирэрэ.

Оттон аччык холкуостаахтар
Аһыҥа тобоҕун оттуу сылдьан,
Алаастарга охтоллоро...
* * *
Итини бүгүҥҥү
Эдэр дэмэкирээттэр
Кырд ьыктамматтар,
Бэл ымаҥнаһаллар.
Тоҕо? — диэтэххэ, — тоттор...
Тоттор — аччыктары өйдөөбөттөр!

6. СААМАЙ БАСТЫҤ НАҔАРААДА
(эмиэ аҕам кэпсээнэ)

Наҕараадалар элбэхтэр —
Сүүһүнэн уордьаннар, мэтээллэр;
Ааттар-суоллар, бириэмийэлэр,
Граннар, академияҕа чилиэннэр...

Былыргыттан быйылга диэри
Түҥэтэллэр итилэри —
Саардар, президеннэр, премьердэр...
Болҕомтолоруттан ким барыта үөрэр!

Мин да балачча элбэххэ тигистим —
Мэтээллэрбин эркиҥҥэ кытта тистим.
Барахсаттарым бачыгыраһаннар —
Брежнев түөһүн, көхсүн санаталлар...

30