Page 17 - Сахаайа Ермолаева Тыыннаах ырыа
P. 17
41.
Ханнаҕын тыл оһуор бисерэ?
Хоһооммор тиһиллэн үөрт эрэ!
Өрөөбүт уостарбын өһүлэн,
Үөрүүбүн үксэтиэҥ эн эрэ!
42.
Иннибэр — үллэҥниир күдэрик,
Кэннибэр — кутурар мэнэрик...
Мунаах кэм! Ким ыйыай аартыгы —
Барыартан сырдыкка тиийэри?
43.
Арыт мин күөрэгэй кэрэбин,
Ардыгар мээрилиир кэҕэбин.
Истинам буоллар дуу күөрэгэй!
Софизм диэтиннэр мээрибин...
44.
Кэнники эн иэччэх буолбуккун,
Доҕор да, өстөөх да курдуккун.
...Махтаныым! Сэрэнэн сылдьарбар
Ыллыкпын ыйааччы суолдьуккун!
45.
Сөҕөбүн — өбүгэм мындырын:
Биллэрэ, иитэ да сылдьарын!
Махталбын суруйан төлүөҕүм —
Сүрэҕим тэбэрин тухары.
46.
“Выгода” туһугар “ыалдьааччы”
Сороҕо араастаах буолааччы.
Норуокка кыһаллар лозуну
Түөһүгэр сурунан сылдьааччы.
15
