Page 134 - Элэс Боотур Бүөтүр Оҕотоойоп

118 П. В. ОГОТОЕВ

Кумалана тоҕуннулар.
Көй салгыны көҥү дайбаан,
3950 Күлүмэхтик көтөн күүгүнээн
Көрүөх бэтэрээ өттүгэр
Көстүбэт буола оҕуста...

Эһэ Хара аттаах
Элэс Боотур:
«Маҕай аллаахтар
Айан киһитин аралдьыттылар», — диэн
Абара санаан,
Суол киһитэ
Суолун тобулаары,
3960 Айан киһитэ
Айанын тэлээри,
Аналлаах атын,
Соргулаах соноҕоһун
Итии-куйаас тыыннаах
Илгэ-быйаҥ эркиннээх
Эҕэрдэлээх илин халлаан
Иитин анна
Саманан буолаарай диэн
Салайа баттаат,
3970 Сэттэ уон сэттэ
Силлиэ-боллоо сирдьиттэнэн,
Аҕыс уон аҕыс
Аан халарык аргыстанан,
Тоҕус уон тоҕус
Дохсун буурҕа доҕордонон,
Ыастаах кустук оноҕос курдук
Ыйылыы көтүтэн,
Түүлээх ох курдук
Түргэнник түһэн,
3980 Илин өттүгэр
Иккилээх оҕо саҕа
Илбис кыыһын
Илэ иэритэн,
Кэлин өттүгэр
Түөртээх оҕо саҕа
Кэнтик төрдүн